前言，這篇故事聽自身邊40幾歲經理既經歷，因為佢話我同佢好好傾，好少後生仔會咁禮貌對人，之後，佢就講點解佢仲未結婚既原因俾我知，聽完後，好唔舒服！佢同我講青春好快就完，入錯行就會後悔一世！ ~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~` 記得，23歲那年，我係跑馬地高級餐廳到做待應，果時人工好高，自己為左錢，日日都拚命返工，一日返12-14個鐘，一個月連小費都有萬幾蚊人工，由於努力工作關係，好快被經理睇起，升做主任，一星期返足6日，日日開鋪到收鋪都要返工！ 咁橋有一日放假，去左朋友結婚宴會，識左個女家既女仔，後來仲約左出來黎食飯，但係第一日食飯就係去高級餐廳到食，原來個女仔屋企好有錢，佢係千金小姐，為左多D見佢，我就做左人生幾大既決定，就係辭左主任既職位，去左做兼職待應，一日返14個鐘，一星期返4-5日，一放假就約佢，同佢週圍去，個千金覺得好多野都未試過，就去左去打機、飲酒、食大排檔都好得意好開心！ 結果，好快大家就拍左一年幾拖，個千金小姐就話帶佢去見佢爸爸媽媽，果日我買左套西裝同果籃去左佢屋企，佢屋企好大，左5-6個工人，花王都有2個，司機一個，保安2個，我咁大個仔都未試過行一個人既屋由大門要行7-8分鐘先去到大廳，入到去，佢爸爸媽媽問我叫咩名，做邊行，人工幾錢，我一答完人工之後，佢地個樣即係黑曬面，佢爸爸仲話帶我去佢辦公室，到我入到去！ 佢爸爸就話:「你應該知道你同我地身份有咩唔同！我要求好簡單，你只要有能力養到我個女我就無所謂，不如你做左經理先同我個女拍拖啦！」 之後，我同個女仔食完飯後，我唔開心左成晚，但我無將件事講俾個女仔講，我答應自己要做到經理賺夠錢，所以我轉左做長工，但係返工時間多左，一星期只有一日假放去陪個女仔，結果，個女仔同我感情淡左，經常怨我唔帶佢出去玩，唔理佢，為左份工為左錢唔錫佢，後來，佢爸爸媽媽仲將個女仔送左去外國讀書，果時，我都有同佢書信來往，因為電話費貴。 之後，到我28歲果年，我升左做副經理，但係個女仔已經無寫信俾我，我一直等，一邊日日返工，到依家40幾歲，都仲未結婚，所以好多野我都睇化左、日日都習慣左自己一個，返工放工，得閒睇下電視，無咩追求！ ~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~ 聽到依到...................我個內好唔舒服，究竟想當初我追求既野係咩？ 我開始對長時間工作有種厭惡、特別係依行既人好多都變左做單身人仕，我讀左咁多書，都係想找一份一星期放2日假，將來有錢供樓養老婆仔女，又有2日陪下佢地既工！真係咁難？ | 
